24 desambra — I Masimbavy Adèle na i Adela de Pfalzel dia niaina tamin'ny taonjato fahavalo. Ny mpanjaka Dagobert II no rainy. Nanambady an'i Odon izy ary niteraka an'i Albéric. Io Albéric io no rain'i Grégoire d'Utrecht, ilay mpianatr'i Masindahy Boniface.

[audio src="/images/sounds/saint-20201224.mp3" background="#0099ffff"]

Nanana ny toerana maha izy azy tokoa teo amin'ny fiaraha-monina i Adèle, satria andriana ny fianakaviany, ary tamin'ny didy miafina nataony no nahalalana izany tetiarana izany. Rehefa maty ny vadin'i Adèle dia niditra tamin'ny fikambanan-drelijiozy izy, ka nanorina trano fitokana-monina tao Pfalzel, diôsezin'i Trèves. Azy ihany io tany nanorenany trano io, ary izy no voalohany nitantana izany trano fitokana-monina izany. Izy ihany koa no nandray an-tanana ny fanabeazana an'i Grégoire, ilay zanak'i Albéric. Tsy foin'i Adèle io zafikeliny io, nefa vao dimy ambin'ny folo taona monja i Grégoire, no nandalo tao amin-dry zareo i Masindahy Boniface ka nanaitra ny antson'Andriamanitra ho misiônera tao amin'i Grégoire. Izay no nahatonga an'i Grégoire ho mpitory ny Vaovao Mahafaly nanerana an'i Allemagne. Marihana fa niely izny lazan'ny toe-panahin'i Adèle tamin'ny fitiavam-bavaka sy ny fanabeazana ny zafikeliny izany, ary nohajain'ny olona fatratra izy tao amin'ny toerana nisy azy.

Fa tsaroana amin'izao andro izao ihany koa i Masindahy Charbel Makhlouf.